У Беларусі ўсё яшчэ не публікуюць звестак пра колькасць нараджэнняў і смерцяў, гэта перасталі рабіць яшчэ ў 2020 годзе. «Люстэрка» з дапамогай BELPOL атрымала свежыя непублічныя звесткі Мінздароўя, якія паказваюць сітуацыю з нараджальнасцю ў краіне.
З непублічнага дакумента Мінздароўя вынікае, што нараджальнасць у Беларусі працягвае падзенне, якое пачалося яшчэ некалькі гадоў таму. У 2023 годзе ў краіне нарадзілася 64 605 дзяцей, а ў 2024-м — толькі 58 993 (то-бок на 8,7% менш).
З улікам гэтых звестак дынаміка колькасці народжаных дзяцей у Беларусі выглядае так.
Колькасць нараджэнняў (2012−2024)
А ў шырэйшай перспектыве — так.
Колькасць нараджэнняў (1990−2024)
Новыя лічбы — чарговы антырэкорд. Колькасць народжаных дзяцей у Беларусі зноў стала самай нізкай за ўсю гісторыю статыстычнай справаздачнасці ў Беларусі — з 1950 года.
Колькасць нараджэнняў (1950−2024)
— Зніжэнне нараджальнасці можа сведчыць пра доўгатэрміновыя дэмаграфічныя і сацыяльна-эканамічныя тэндэнцыі, уключаючы змяненне структуры насельніцтва, узровень дабрабыту і сацыяльныя прыярытэты, — гаворыцца ў дакуменце Мінздароўя.
Што здарылася з афіцыйнай статыстыкай?
Нагадаем, інфармацыю пра нараджальнасць і смяротнасць Белстат апошні раз абнаўляў у траўні 2020 года. З таго часу арганізацыя перастала публікаваць гэтыя звесткі (і не толькі іх).
Апошні «Дэмаграфічны штогоднік» ведамства выпусціла па выніках 2019 года. Пасля гэтага Белстат спраўна абнаўляў інфармацыю пра насельніцтва Беларусі ў цэлым, выпускаў штогадовыя зборнікі з мноствам паказчыкаў. Але колькасці народжаных і памерлых там не агучвалі, як і паказчыкаў міграцыі.
Журналіст «Люстэрка» ў студзені 2022 года як грамадзянін звяртаўся ў статыстычнае ведамства з пытаннем пра звесткі па нараджальнасці і смяротнасці за 2020 год. Нам тады адказалі, што гэтыя звесткі «ў працэсе распрацоўкі». Акрамя таго, падкрэслілі, што ў сваёй працы арганізацыя «кіруецца прынцыпам прафесійнай незалежнасці, самастойна прымае рашэнні што да вызначэння тэрмінаў выпуску і зместу афіцыйнай статыстычнай інфармацыі».
Са статыстыкі ААН у сярэдзіне 2020-га стала вядома, што смяротнасць па выніках першага паўгоддзя пабіла пяцігадовы рэкорд — 66,9 тысячы памерлых, у той час як цягам чатырох гадоў да гэтага паказчык не перавышаў 62,5 тысячы смерцяў. З тых самых звестак вынікала, што ў чэрвені 2020-га колькасць смерцяў на 3753 выпадкі перавысіла паказчык за той жа месяц 2019 года. Пасля таго як беларускія медыя звярнулі ўвагу на гэтую статыстыку, у базе дадзеных ААН паказчыкі па нашай краіне таксама перасталі абнаўляцца.
Чытайце таксама
