Сёння, 16 лютага, КДБ паведаміў пра затрыманне «ўдзельнікаў дыверсійна-разведвальнай групы», якія нібыта перасеклі ўкраінска-беларускую мяжу і рыхтавалі тэракты. Сярод траіх затрыманых — двое грамадзян Украіны і адзін беларус. Апошняга завуць Віталь Уласюк. З дапамогай BELPOL расказваем, што пра яго вядома.
Віталь Уласюк нарадзіўся ў 1970 годзе ў Туркменістане (горад Кізыл-Арват). Жыве і прапісаны ў Брэсце. Ён былы вайсковец. Праходзіў службу ў вайсковай частцы 65 263 у Баранавічах, а таксама ў 38-й асобнай гвардзейскай дэсантна-штурмавой брыгадзе.
У 2007 годзе ён, відаць, ужо пакінуў вайсковую службу і працаваў у брэсцкай аўташколе «Вялікая Мядзведзіца». Апошняе вядомае месца працы — ТАА" РэджынаРэд «у Брэсце. Кампанія выпускала вопратку. Ліквідаваная ў 2017 годзе.
На сваёй старонцы ў «Аднакласніках» Уласюк лайкаў пасты з падтрымкай Расіі ў вайне ва Украіне.
У 2015 годзе ён узяў удзел у маршы «Несмяротнага палка» ў Брэсцкай крэпасці. Мяркуючы з апублікаваных ім фота, у жніўні 2023 года былы вайсковец ездзіў у расійскі Пяцігорск.
Жонка Уласюка (мяркуючы з яе сацсетак) працуе на станцыі пералівання крыві ў Брэсце.