За забойства трохгадовага хлопчыка ў Слуцку будуць судзіць службовых асоб за «бяздзейнасць і халатнасць»

12 чэрвеня 2024 у 1718201280
«Зеркало»

У Менску будуць судзіць службовых асоб, «чые бяздзейнасць і халатнасць спрыялі магчымасці працяглага катавання малагадовага Сямёна Таратуты», якога забілі бацькі ў Слуцку. Пра гэта паведаміла 12 чэрвеня прэс-служба Вярхоўнага суда.

Крымінальная справа паступіла ў суд Мінскага раёна. Колькі па ёй праходзіць абвінавачаных і якія пасады яны займаюць, у прэс-рэлізе не паведамляецца.

Нагадаем, у студзені мінулага года дома ў прысутнасці дзвюх сясцёр і брата хлопчыка бацькі Анастасія і Аляксандр Таратуты рукамі і нагамі збілі да смерці свайго сына Сямёна.

Хлопчык нарадзіўся ў 2019 годзе, і літаральна з самага нараджэння яго катавалі. Ён галадаў і быў знясілены. Таксама бацькі абмяжоўвалі яго свабоднае перамяшчэнне, звязваючы яму рукі і ногі.

Шматдзетных бацькоў - 37-гадовую Анастасію Таратуту і 48-гадовага Аляксандра Таратуту - судзілі па двух артыкула Крымінальнага кодэкса Беларусі:

• ч. 2 арт. 154 (Наўмыснае ўчыненне працяглага болю, пакутаў спосабамі, якія выклікаюць асаблівыя фізічныя і псіхічныя пакуты, сістэматычнае нанясенне пабояў (катаванне), здзейсненае ў дачыненні да загадзя няпоўнагадовага, асобы, якая знаходзіцца ў бездапаможным стане і ў залежным становішчы);
• пп. 2, 6, 15 ч. 2 арт. 139 (Наўмыснае супрацьпраўнае пазбаўленне жыцця іншага чалавека (забойства), заведама малагадовага, асобы, якая знаходзіцца ў бездапаможным стане, здзейсненае з асаблівай жорсткасцю, групай асоб).

Іх прызналі вінаватымі і прызначылі: бацьку - расстрэл, маці - 25 гадоў калоніі.