Ці ёсць у вашай сям'і Audi, Porsche або Mercedes? Не? А грошы на такія аўто з вашай кішэні ўсё роўна «выцякаюць» — тлумачым, як так

9 красавiка 2025 у 1744178940
Ніна Атэза / «Зеркало»

У Беларусі ёсць камерцыйная структура «Белтрансспецаўто», якая ўваходзіць у Кіраўніцтва справамі Лукашэнкі. Па сутнасці, гэта свайго роду аўтапарк, якім карыстаюцца палітык і яго атачэнне з высокапастаўленых чыноўнікаў. Кожны год структура бярэ з бюджэту мільёны рублёў на свае патрэбы. Расказваем, у колькі падаткаплатнікам абыдуцца яе запыты сёлета.

Даведка «Люстэрка». «Белтрансспецаўто» выконвае шырокі спектр паслуг - ад пасажырскіх і грузавых перавозак да абслугоўвання VIP-дэлегацый прадстаўніцкімі аўто. Прадпрыемства займаецца транспартным абслугоўваннем на высокім узроўні некаторых чыноўнікаў (на выбар Лукашэнкі), а таксама замежных дэлегацый (у тым ліку афіцыйных асобаў). Паводле звестак «Радыё Свабода», у яе найбуйнейшая аўтастаянка ў Мінску і вялікі аўтапарк: каля 900 аўтамабіляў 296 розных мадэляў - ад лімузінаў да экскаватараў. Арганізацыя не абмяжоўваецца абслугоўваннем дзяржэліты: яна актыўна зарабляе, прапаноўваючы паслугі па арэндзе транспарту, рамонце аўто, грузаперавозках, а таксама навучанні ва ўласнай аўташколе. Акрамя таго, паводле інфармацыі выдання, «Белтрансспецаўто» можа атрымліваць дадатковы даход ад перапродажу ці здавання ў арэнду машын, якія раней выкарыстоўваліся чыноўнікамі.

Абслугоўванне аўтамабіляў амаль на 1 млн рублёў

Сёлета «Белтрансспецаўто» планавала выдаткаваць на тэхабслугоўванне і рамонт транспарту 962,5 тыс. рублёў. Год таму на гэта вылучалі 907 тыс. Пры гэтым у 2025-м каля 790 тыс. на гэта возьмуць з бюджэту, а астатнюю частку закрыюць за кошт сродкаў арганізацыі.

Гаворка ідзе пра тэхабслугоўванне люксавых аўтамабіляў. Сярод іх некалькі машын Audi А6 і А8 розных гадоў выпуску - пачынаючы з 2007 і заканчваючы 2024-м. Таксама Porsche Cayenne 2012 года, Mercedes-Benz E-Class і S-Class 2022-га. А таксама розныя мадэлі Lexus, Volkswagen, Skoda, Toyota і іншыя.

Часткай гэтага транспарту, хутчэй за ўсё, карыстаецца сам Аляксандр Лукашэнка. Напрыклад, Audi А8 - адна з тых, якія палітык выкарыстоўваў раней, калі сам садзіўся за руль. У аўтапарку палітыка былі як мінімум дзве машыны гэтай мадэлі. Тое самае датычыць Mercedes-Benz. Некалькі з іх (больш ранніх версій) былі заўважаныя ў атачэнні Лукашэнкі, а часам і ў карыстанні палітыкам.

А Volkswagen Caravelle выкарыстоўваюцца для суправаджэння палітыка падчас паездак.

Як пісала раней «Радыё Свабода», на балансе «Белтрансспецаўто» ёсць раскошны Mercedes, якім карыстаўся Раман Галоўчанка, калі быў прэм'ерам. А таксама прадстаўнічыя Audi A8 для высокапастаўленых чыноўнікаў накшталт Наталлі Качанавай або Дзмітрыя Крутога, а таксама аўтамабілі, якія абслугоўваюць міністраў і нават старэйшага сына Лукашэнкі - Віктара.

Новыя аўтамабілі

У канцы мінулага года «Белтрансспецаўто» падпісала дамову з «Атлант-М Баравая» на куплю 11 аўто агульным коштам 1,147 млн рублёў. Аўтапарк папоўнілі шасцю Belgee X70 люксавай камплектацыі і пяццю Geely Tugella.

У студзені гэтага года арганізацыя купіла яшчэ адно аўто Geely. Дакладная сума ўгоды невядомая, але вылучалі на гэта 126,8 тыс.

У абодвух выпадках сродкі ўзялі з бюджэту.

Паліва

Акрамя іншага ў пачатку 2025-га структура падала заяўку на забяспечанне аўтапарка бензінам і дызелем. На гэта вылучылі амаль 2,5 млн рублёў. Як вынікае з дакументаў, больш чым 1,7 млн узялі на гэта з бюджэту, а астатняе - фінансы «Белтрансспецаўто».

Таксама 66 тыс. рублёў сёлета вылучылі на куплю летняй гумы. У гэтым выпадку таксама частка - гэта сродкі з казны, а астатнія - самой арганізацыі.

Чытайце таксама